Ieithoedd Cynhenid, Lleiafrifol a Llai eu Defnydd
Prif Weinyddiaeth – Cymru 

Mae gan ardal Cyngor Prydain-Iwerddon gyfoeth o etifeddiaeth ieithyddol. Mae’r holl aelodau yn awyddus i elwa ar y manteision a allai ddeillio o amrywiaeth ieithyddol trwy gydweithredu, rhannu arferion gorau, dosbarthu gwybodaeth a deunydd a dysgu o brofiadau’r naill neu’r llall mewn sawl maes gwahanol.

Gwnaed Ieithoedd Cynhenid, Lleiafrifol a Llai eu Defnydd yn faes gwaith Cyngor Prydain-Iwerddon yn y gynhadledd yn Jersey yn 2002.

Cyfarfu Gweinidogion yn Galway yn Hydref 2006 i drafod cynnydd mewn tri maes: trosglwyddo iaith o fewn y teulu, darpariaeth addysg oedolion, a TGCh ar gyfer Ieithoedd Cynhenid, Lleiafrifol a Llai eu Defnydd. Communiqué

Cydnabyddir trosglwyddo iaith o fewn y teulu yn floc adeiladu hollbwysig yn y broses o gynnal iaith. Cynhaliwyd gweithdy ar gyfer ymarferwyr a oedd yn gweithio ym maes trosglwyddo iaith o fewn y teulu yn Hydref 2006.

Mae gwaith yn parhau yn y maes hwn i archwilio sawl elfen wahanol: modelau o’r hyn sy’n gweithio o ran cynnal trosglwyddo iaith yn y teulu; sut y gellid trosglwyddo modelau i sefyllfaoedd iaith eraill; a nodi bylchau mewn gwybodaeth; a sut y gallai gweinyddiaethau CPI weithio gyda’i gilydd i lenwi’r bylchau hynny.

Mae datblygiadau diweddar mewn TGCh yn hwyluso defnyddio ieithoedd lleiafrifol a chodi eu statws. Sefydlwyd is-grŵp o arbenigwyr i sbarduno gwaith pellach yn y maes hwn. Cynhelir seminar ar gyfer arbenigwyr sy'n gweithio gyda TGCh a ieithoedd llai eu defnydd yng Nghaerdydd ym mis Tachwedd 2007.

Trefnir gweithdy ar gyfer ymarferwyr hefyd ym mis Tachwedd 2007, i archwilio cyfleoedd ar gyfer cydweithredu rhwng aelod-weinyddiaethau ym maes addysg oedolion.

Bydd y weinyddiaeth yn canolbwyntio ar feysydd newydd fel rhan o’r rhaglen waith gyfredol: cynllunio ac ystyriaethau ieithyddol ac ymchwil; deddfwriaeth; a data ac arolygon o ddefnydd iaith.

Ieithoedd Cynhenid, Lleiafrifol a Llai eu Defnydd oedd ffocws Pumed Cynhadledd Cyngor Prydain-Iwerddon a gynhaliwyd yng Nghaerdydd ym mis Tachwedd 2003. Communiqué

Mae’r dudalen hon hefyd ar gael yn yr ieithoedd canlynol:

Gaelg / Manaweg
Gaidhlig / Gaeleg yr Alban
An Ghaeilge/ Gwyddeleg
Guernesiais/Ffrangeg Guernsey
Jèrriais / Ffrangeg Jersey
Ulstèr-Scotch / Sgoteg Ulster